- 阿四：
- 你又話同我嚟金管局資訊中心睇銀紙嘅，銀紙呢？
- 小森：
- 眼前呢件藝術品「銀紙經」咪係囉！你睇真啲每粒透明立方塊，裡面係切碎咗嘅銀紙嚟㗎。載有一百元同十元碎鈔嘅立方塊望落就似紫荊花；五十元、二十元同舊版十元「青蟹」嘅就似樹葉；五百同一千元紙幣嘅就似樹幹。呢二千零一十八粒立方塊絲絲緊扣，仿似一棵猶然聳立嘅紫荊樹。
- 阿四：
- 有創意！碎鈔喺邊度嚟？
- 小森：
- 係由三間發鈔銀行同印鈔廠將一啲不再適合流通嘅銀紙，切碎後交畀藝術團隊。當中有啲碎鈔好似米粒咁細㗎，藝術團隊要慢慢挑選顏色分類，再重新整合成不同形狀，少啲耐性同心思都唔得。
- 阿四：
- 係喎！睇真啲每粒透明立方塊裡面的碎銀紙形狀都唔同。
- 小森：
- 佢哋各具形態，有啲重新整合嘅碎銀紙係一粒粒，有啲係一條條，有啲係一片片，疏密有致，令到棵樹層次感更豐富。
- 阿四：
- 呢啲立方塊由垂直嘅鋼絲穿起，每粒嘅擺位要計得好準確，先可以製作出立體紫荊樹嘅效果喎。
- 小森：
- 無錯。藝術團隊首先用積木砌出紫荊樹模型，然後由電腦分析立方塊嘅擺位，逐串穿好後再裝置，總共有650串之多。
- 阿四：
- 企耐啲睇，原來欣賞「銀紙經」仲可以配合燈光效果，呈現紫荊樹四時美態！
- 小森：
- 資訊中心嘅「貨幣」展區啱啱完成翻新，除咗「銀紙經」外，仲加入好多互動裝置和教育遊戲，等大家更了解香港貨幣嘅發展，好適合一家大小嚟參觀，開放時間可以喺金管局網站搵到。
圖片說明：「銀紙經」配合燈光效果，展現樹姿四季美態。
圖片說明：碎鈔立方塊各具形態。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
