银纸经‧银紫荆

小森阿四專欄

2018年08月17日

银纸经‧银紫荆

阿四:
你又话同我嚟金管局资讯中心睇银纸嘅,银纸呢?

小森:
眼前呢件艺术品「银纸经」咪系罗!你睇真啲每粒透明立方块,里面系切碎咗嘅银纸嚟㗎。载有一百元同十元碎钞嘅立方块望落就似紫荆花;五十元、二十元同旧版十元「青蟹」嘅就似树叶;五百同一千元纸币嘅就似树干。呢二千零一十八粒立方块丝丝紧扣,仿似一棵犹然耸立嘅紫荆树。

阿四:
有创意!碎钞喺边度嚟?

小森:
系由三间发钞银行同印钞厂将一啲不再适合流通嘅银纸,切碎后交畀艺术团队。当中有啲碎钞好似米粒咁细㗎,艺术团队要慢慢挑选颜色分类,再重新整合成不同形状,少啲耐性同心思都唔得。

阿四:
系喎!睇真啲每粒透明立方块里面的碎银纸形状都唔同。

小森:
佢哋各具形态,有啲重新整合嘅碎银纸系一粒粒,有啲系一条条,有啲系一片片,疏密有致,令到棵树层次感更丰富。

阿四:
呢啲立方块由垂直嘅钢丝穿起,每粒嘅摆位要计得好准确,先可以制作出立体紫荆树嘅效果喎。

小森:
无错。艺术团队首先用积木砌出紫荆树模型,然后由电脑分析立方块嘅摆位,逐串穿好后再装置,总共有650串之多。

阿四:
企耐啲睇,原来欣赏「银纸经」仲可以配合灯光效果,呈现紫荆树四时美态!

小森:
资讯中心嘅「货币」展区啱啱完成翻新,除咗「银纸经」外,仲加入好多互动装置和教育游戏,等大家更了解香港货币嘅发展,好适合一家大小嚟参观,开放时间可以喺金管局网站搵到。

图片说明:「银纸经」配合灯光效果,展现树姿四季美态。
图片说明:「银纸经」配合灯光效果,展现树姿四季美态。 

图片说明:碎钞立方块各具形态。
图片说明:碎钞立方块各具形态。

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年08月17日