银行挤提的日子

小森阿四專欄

2018年12月07日

银行挤提的日子

阿四:
金管局工作之一系维持银行体系稳定,确保市民存款嘅安全。究竟香港曾经出现过几多次银行挤提?

 

小森:
香港喺六十同八十年代都出现较大规模嘅挤提。先讲六十年代,1965年市场传出「明德银号」资金紧绌,因而引发挤提,几日后就倒闭,仲波及多间华资银行先后被挤提,即使当时呢啲银行本身无营运问题,但亦难以承受大量存户同时提款,其中一间大型华资银行更喺呢次挤提潮中,需要向同业出售控股权。

 

阿四:
八十年代嘅挤提潮又系点嘅呢?

 

小森:
八十年代有好几间银行出现挤提,原因不尽相同,但总括嚟讲,当时陷入财困嘅恒隆银行、海外信托银行同佢嘅子公司香港工商银行,最后都由政府接管,并且需要动用外汇基金注资,以维持呢啲银行嘅日常运作,减低对市民嘅影响。整个八十年代,外汇基金总共动用咗90亿港元拯救出事嘅银行。而九七年亚洲金融危机时,外汇基金亦有向一间挤提嘅银行提供280亿元债务担保。

 

阿四:
如果唔系外汇基金有足够弹药,为香港金融稳定提供最后防线嘅话,后果不堪设想。

 

小森:
无错,但2008年全球金融危机时,各地政府动用天文数字嘅公帑拯救「大得不能倒」金融机构,呢种「佢请客,我埋单」嘅做法受尽各界非议。国际间于是制定咗「处置机制」,避免再用巨额公帑帮经营不善金融机构填氹,中央银行嘅最后贷款人角色亦有所转变。

 

阿四:
我哋之前都介绍过「处置机制」,其中一样措施就系要银行做定准备,将来出事时,由银行股东同埋债权人承担返倒闭嘅亏损。

 

小森:
香港银行都审慎经营,资本非常充足,大家又唔使过虑!

 

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年12月07日