优化版香港年金计划嚟啦!

小森阿四專欄

2018年12月14日

优化版香港年金计划嚟啦!

小森:
阿四,世伯有冇参加到香港年金计划呀?

 

阿四:
无呀。佢觉得买终身年金等如锁住啲钱,担心日后有乜头晕身㷫,唔够钱应急。

 

小森:
香港年金计划啱啱推出优化版本喎!投保嘅「老友记」可以申请「特别款项提取」,用嚟支付喺香港嘅医疗,包埋牙科嘅费用。最高可提取金额系已缴保费嘅一半,或已缴保费扣除已派发累积年金之后嘅金额,以较低者为准,而提取金额上限系30万元及只可以提取一次。不过注意返,提取后,每月年金金额就会按比例减少咗。

 

阿四:
仲有一点令我爸爸犹豫,就系万一佢未攞足保证金额就同大家讲拜拜,后人想一笔过攞返年金嘅保证期数,需要打折扣,佢觉得好蚀底。

 

小森:
优化版香港年金计划提供「百分百一笔过身故赔偿」,后人可以即时一笔过收取全数已缴保费(扣除已派发嘅累积保证年月年金金额),世伯可以安心投保啦!

 

阿四:
有啲老友记觉得,计划嘅投保上限100万元,每月攞嘅钱唔系几见使喎。

 

小森:
投保上限已经提高到200万元啦!换言之,65岁投保200万元嘅男士同女士,分别可以收到每月$11,600同$10,600。

 

阿四:
咁要等几耐先有下一轮香港年金计划发售?

 

小森:
唔使等!香港年金计划改用全年持续销售模式,有兴趣嘅老友记可以先打去2512-5000或喺年金公司网站(www.hkmca.hk)预约,然后亲身到上环或荔枝角嘅销售处办理投保手续。

 

阿四:
咁认购咗香港年金计划嘅老友记,系咪一样受惠上述嘅优化措施㗎?

 

小森:
无错!假如佢哋想加大投保额,再去办理新保单就搞掂!

 

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年12月14日