- 阿四：
- 金管局每年為高中學生舉辦嘅公眾教育講座開始咗啦，聽聞今年仲加開一場，總共有四場。
- 小森：
- 無錯，以往分別喺港島、九龍同新界各開一場，今年反應熱烈，喺九龍連開兩場，希望畀更多同學同老師參與。
- 阿四：
- 呢個講座講啲乜㗎？
- 小森：
- 公眾教育講座自一九九八年已經開始舉辦，畀同學更直接咁了解金管局嘅工作，同埋增進相關嘅金融知識，好似聯繫匯率和香港鈔票都係講座嘅重點。我哋亦會因應每年最新發展，加入唔同嘅專題。前幾年就加咗銀行監管和消費者教育等內容，今年就有關於金融科技、基建融資同金融業就業前景嘅討論。不得不提，我哋今年仲首次邀請到香港銀行學會嘅代表，介紹銀行業就業前景。
- 阿四：
- 講座內容都幾與時並進喎。不過啲題目聽落咁深，中學生聽唔聽得明？
- 小森：
- 同事喺講座前俾咗好多心機去預備，內容都盡量同學生嘅學習內容或日常生活息息相關，又透過好多日常例子，配合淺白語言，希望盡量做到深入淺出。今年講座嘅表達方式都有所不同，同事再唔係喺台上「獨唱」，而係透過對答同埋小組討論，仲會不時出問題考下台下同學，而同學都好積極回答，整體氣氛幾互動㗎。
- 阿四：
- 聽落真係幾精采喎！
- 小森：
- 係呀，喺首兩場講座之後，我哋收集咗不少老師同學嘅意見，大部分都認為講座加深咗佢哋嘅金融知識，有助佢哋日後嘅應用甚至將來就業。
- 阿四：
- 每年講座有幾多人出席？
- 小森：
- 每年大約有二千位同學同老師出席。自一九九八年推出以嚟，累計已有超過五萬六千人參與。
- 阿四：
- 如果對呢個講座有興趣，可以點樣報名？
- 小森：
- 金管局每年會向中學寄邀請信。錯過咗今年講座？唔緊要，老師可以電郵畀我哋，安排出席下年講座。同學亦可以嚟參觀金管局位於中環國金2期55樓嘅資訊中心。
圖片說明：金管局公眾教育講座今年加咗豐富嘅內容，讓同學獲得最新嘅金融知識。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
