- 小森：
- 我啱啱參觀完金管局資訊中心的全新展區，幾好玩呀，你參觀咗未？
- 阿四：
- 新展區唔係仲裝修緊咩？
- 小森：
- 差唔多完啦。你都知金管局鍾意做壓力測試，未開放畀公眾前就搵同事試下人流負荷。今次翻新嘅係介紹金管局工作嘅展區，你記唔記得未變身前係點？
- 阿四：
- 咪有個接待處，同埋幾塊介紹金管局工作嘅「文字牆」展板囉，上面嘅內容都幾「深不可測」㗎。
- 小森：
- 咁又係。金管局四大工作：維持貨幣穩定、促進銀行體系穩定、管理外匯基金，同埋鞏固香港嘅國際金融中心地位，樣樣都咁專業。
- 阿四：
- 我知道有好多小朋友嚟資訊中心參觀，要佢哋企定定睇展板，又真係難啲。
- 小森：
- 所以資訊中心變身就引入咗好多互動元素。唔同部門嘅同事都落咗唔少心機將一啲金融概念化繁為簡，希望展出內容深入淺出，大人小朋友都一樣睇得明。
- 阿四：
- 有乜互動元素？
- 小森：
- 例如安裝咗六款寓教育於遊玩嘅互動遊戲，其中一個仲有我哋兩個客串㖭！希望嚟參觀嘅同學玩得開心，又吸收到金融知識！
- 阿四：
- 資訊中心咪變咗機舖？
- 小森：
- 唔會！呢啲互動遊戲想攞高分，要睇埋展板內容先得㗎。
- 阿四：
- 又係展板？
- 小森：
- 新展板嘅文字淺白易明咗，如想更深入了解金管局嘅工作，亦可使用新設嘅輕觸式屏幕。舊展板有字數限制，新設計就可以上載更豐富內容同圖像。
- 阿四：
- 聽起來老少咸宜，好適合一家大細嚟參觀。
- 小森：
- 仲有一個消費者教育專區，教大家一啲銀行服務嘅至醒貼士。想知自己係咪一個精明消費者，即場玩下遊戲就知。
- 阿四：
- 資訊中心幾時重新開放？
- 小森：
- 2月24號重開啦！留意返開放時間係周一至周五上午10時至傍晚6時、周六早上10時至下午1時，紅日休息。其實我參觀時見到有班人擒高擒低、埋頭苦幹整緊一件展品，神神秘秘咁，下次講你知。
（下集再續）
想問多啲有關金管局工作嘅題目，歡迎電郵到小森、阿四專用郵箱：88hkma@hkma.gov.hk
資訊中心變身工程就快完成，舊展板（圖右）將會被輕觸式屏幕替代，展覽內容更豐富。
