资讯中心新形象

小森阿四專欄

2017年02月17日

资讯中心新形象

小森:
我啱啱参观完金管局资讯中心的全新展区,几好玩呀,你参观咗未?  

阿四:
新展区唔系仲装修紧咩?  

小森:
差唔多完啦。你都知金管局钟意做压力测试,未开放畀公众前就搵同事试下人流负荷。今次翻新嘅系介绍金管局工作嘅展区,你记唔记得未变身前系点?  

阿四:
咪有个接待处,同埋几块介绍金管局工作嘅「文字墙」展板罗,上面嘅内容都几「深不可测」㗎。  

小森:
咁又系。金管局四大工作:维持货币稳定、促进银行体系稳定、管理外汇基金,同埋巩固香港嘅国际金融中心地位,样样都咁专业。  

阿四:
我知道有好多小朋友嚟资讯中心参观,要佢哋企定定睇展板,又真系难啲。  

小森:
所以资讯中心变身就引入咗好多互动元素。唔同部门嘅同事都落咗唔少心机将一啲金融概念化繁为简,希望展出内容深入浅出,大人小朋友都一样睇得明。  

阿四:
有乜互动元素?  

小森:
例如安装咗六款寓教育于游玩嘅互动游戏,其中一个仲有我哋两个客串㖭!希望嚟参观嘅同学玩得开心,又吸收到金融知识!  

阿四:
资讯中心咪变咗机铺?  

小森:
唔会!呢啲互动游戏想攞高分,要睇埋展板内容先得㗎。  

阿四:
又系展板?  

小森:
新展板嘅文字浅白易明咗,如想更深入了解金管局嘅工作,亦可使用新设嘅轻触式屏幕。旧展板有字数限制,新设计就可以上载更丰富内容同图像。  

阿四:
听起来老少咸宜,好适合一家大细嚟参观。  

小森:
仲有一个消费者教育专区,教大家一啲银行服务嘅至醒贴士。想知自己系咪一个精明消费者,即场玩下游戏就知。  

阿四:
资讯中心几时重新开放?  

小森:
2月24号重开啦!留意返开放时间系周一至周五上午10时至傍晚6时、周六早上10时至下午1时,红日休息。其实我参观时见到有班人擒高擒低、埋头苦干整紧一件展品,神神秘秘咁,下次讲你知。  

(下集再续)

想问多啲有关金管局工作嘅题目,欢迎电邮到小森、阿四专用邮箱:88hkma@hkma.gov.hk

资讯中心变身工程就快完成,旧展板(图右)将会被轻触式屏幕替代,展览内容更丰富。

资讯中心变身工程就快完成,旧展板(图右)将会被轻触式屏幕替代,展览内容更丰富。

最新小森阿四專欄
修订日期 : 2017年02月17日