- 阿四：
- 我見到金管局網頁新出現一個「25」標誌喎！上星期出嘅金管局年報仲用咗「25」設計字樣做封面。
- 小森：
- 你有冇留意到，標誌當中嘅2同5係仿照兩蚊同五蚊硬幣字樣而設計。用色方面，除咗有金管局標誌原有嘅紫色同灰色，仲增添咗銀色代表銀禧紀念。
- 阿四：
- 唔經唔覺今年係金管局成立二十五周年，點慶祝先？
- 小森：
- 慶祝活動係工作如常，繼續為香港銀行同金融體系穩定打拼！
- 阿四：
- 咁官腔㗎。
- 小森：
- 我係實話實說。如果要慶祝嘅話，今年有好多事情紀念，好似聯繫匯率實施三十五周年、外匯基金「入市」對抗「大鱷」二十周年等。
- 阿四：
- 睇返金管局成立以來，香港銀行業發展蓬勃，銀行資產總額由一九九三年約六萬億港元，升至二○一七年廿二萬七千億港元，升幅近三倍咁多。
- 小森：
- 本港銀行嘅客戶存款亦由一九九三年嘅一萬七千億港元，大升六倍至十二萬七千幾億港元。你都知道金管局主要職責之一，係睇住市民嘅銀行存款得到充分保障，除咗透過加強銀行管理風險，外匯基金亦向存款保障計劃提供備用信貸，萬一有銀行倒閉嘅話，可以用呢筆錢盡快向存款人發放補償，為銀行穩定提供強大後盾。
香港銀行資產增長迅速
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
