- 小森：
- 有讀者想我哋介紹多啲人民幣業務呀！
- 阿四：
- 我知我知，而家人民幣息高過港紙，我都有啲定期做咗！
- 小森：
- 唉，我哋讀者好有水平，佢係想問下人民幣國際化嘅工作。考下你，香港嘅離岸人民幣係幾時開始？
- 阿四：
- 2004年吖嘛！香港開始試辦個人人民幣業務，仲記得當年有每人每日兌換兩萬人民幣嘅上限，到咗2014年滬港通開通，加上市場對人民幣兌換需求不斷增加，經過金管局同銀行業界多年向內地爭取，終於取消上限，可以喺離岸無上限兌換人民幣。
- 小森：
- 離岸人民幣業務已經由個人存戶伸展到貿易同投資領域，呢兩年隨住滬港通、深港通開通，跨境投資亦唔再局限喺機構投資者，散戶都有機會參與。成個過程下面幅圖睇晒。
- 阿四：
- 我知道金管局喺金融基建方面做咗好多工作，去支持離岸人民幣業務發展。
- 小森：
- 無錯，香港離岸人民幣市場可以運作得咁順暢，甚至成為全球最大離岸人民幣支付結算中心，金管局嘅人民幣即時支付系統可以話係幕後功臣之一。呢個系統可以處理來自全球人民幣業務參加銀行嘅人民幣結算，以及內地同香港嘅跨境支付，事實上，根據環球銀行金融電訊協會（SWIFT）的數字，全世界有大約七成人民幣支付交易係經香港處理。目前每日人民幣即時支付結算成交約9000億人民幣咁多，仲多過港元即時支付結算(約6000億)。就算交易咁繁忙，系統都從未甩過拖，算唔話得啦。
- 阿四：
- 仲有呀，金管局向市場提供人民幣流動資金安排，每次當市場人民幣供不應求，呢啲資金就係及時雨，穩住市場信心。
- 小森：
- 國際市場好多人民幣產品定價，都係參考香港首創嘅利率基準㗎！
- 阿四：
- 仲有，金管局明年推出快速支付系統，市民只需一個手機號碼或電郵地址，除咗港元仲可以暢通無阻咁用人民幣支付㖭。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
