區塊鏈唔止虛擬商品咁簡單

小森阿四專欄

2018年04月27日

區塊鏈唔止虛擬商品咁簡單

 

小森:
阿四,我舊年喺度用打麻將嘅比喻,同你講解區塊鏈(blockchain)點運作,估唔到呢一年區塊鏈發展得咁快,而家無乜人未聽過區塊鏈啦。

 

阿四:
可惜唔少人都以為區塊鏈即係虛擬商品哩!談論重點通常係邊隻有得「炒」。其實區塊鏈嘅應用非常廣泛,虛擬商品只係芸芸眾多應用區塊鏈技術產品之一。

 

小森:
無錯。區塊鏈嘅本質係記帳簿,凡係需要「扎低」資料嘅地方,就用得上呢個技術。只不過因為虛擬商品見報率高,所以大家忽略區塊鏈其他嘅應用潛能。

 

阿四:
除咗之前講過應用喺樓宇按揭、貿易融資外,我聽專家講,區塊鏈仲可以用喺食物供應方面 :一棵菜由生長、收割、經過批發商、零售商再賣畀消費者,用區塊鏈記錄整個流程嘅話,中間有人想竄改食物嘅來源都好難,有助提高食物安全。聯合國亦研究運用區塊鏈技術推出無國界嘅數碼身份,以解決難民離開家園後,失去原先嘅身份認證嘅問題。仲有呀,澳洲有個先導計劃,畀市民利用區塊鏈嚟「扎低」互相買賣自家生產嘅太陽能或風力電源嘅帳目。

 

小森:
有啲料到喎!區塊鏈專家你都識。

 

阿四:
我上星期參加咗由金管局同數碼港合辦嘅「金融科技O2O」聚會,聽咗幾位專家分享區塊鏈最新發展,學到唔少嘢。今次已經係金管局金融科技促進辦公室第三次舉辦「金融科技O2O」聚會,每次都會邀請重量級人物演講,同埋設有交流環節畀銀行同科技界多啲互動同溝通,深受業界歡迎。
 

圖片說明:金管局最近同數碼港合辦「金融科技O2O聚會」,座無虛席。

圖片說明:金管局最近同數碼港合辦「金融科技O2O聚會」,座無虛席。

 

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年04月27日