銀行戶口咪借人

小森阿四專欄

2018年06月01日

銀行戶口咪借人

阿四:
我有位親戚用個人銀行戶口處理生意往來嘅資金,最近戶口被銀行取消咗。因乜解究? 

小森:
近年國際社會大力打擊洗錢等呢啲不法行為,銀行亦因而加強監控呢類嘅活動。個人戶口本身唔係畀人用嚟做生意㗎嘛,所以銀行一發現戶口有異常資金進出,懷疑同洗錢有關,就會凍結甚至取消戶口。

阿四:
呢位親戚想借我銀行戶口用住先,唔係用嚟做生意,咁又得唔得?

小森:
無論任何情況,銀行戶口都唔能夠借畀其他人用。你去銀行開戶口時,銀行核對過你嘅身份證明,了解過你嘅戶口用途,先至開戶口畀你。戶口借咗畀人用,就同你之前向銀行申報嘅用途有出入,萬一涉及不法活動,分分鐘會變成「洗黑錢」。 

阿四:
查實咩係「洗黑錢」呢?

小森:
所謂「洗黑錢」,就係不法份子將喺販毒、貪污、避稅、詐騙等等呢啲非法活動收取嘅「黑錢」,透過各種手段,例如借用良民嘅戶口,以掩飾呢啲錢嘅來源。「處理犯罪得益」罪,即係洗黑錢,最高刑罪係罰款500萬港元同埋監禁14年。

阿四:
原來借戶口畀人用可以咁大件事㗎,但我乜都唔知情,都係犯法?

小森:
如果你戶口借出去涉及不法活動,就好大機會當你有份參與㗎嘞。新聞都經常有呢類報道,有啲人出於好心抑或貪心而借出戶口被人洗錢,上到法庭個陣用「唔知情」求情,最後都會被判罪。 

阿四:
聽完你講,我仲點敢借戶口畀人!香港係國際金融中心,資金自由流動,所以金管局一直好緊張反洗錢同恐怖分子資金籌集嘅工作,同銀行、執法機構緊密合作,做好把關工作,並採取國際標準嘅監管模式,阻止黑金「漂白」,保障香港銀行體系嘅健全同聲譽,令市民和正當企業獲得安全可靠嘅銀行服務。


想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2018年06月01日