- 小森：
- 陳總，你最近馬不停蹄出差喎！早排飛完去美國Jackson Hole，跟住上星期又去咗北京，主持由金管局同中國銀監會合辦嘅「香港高級銀行家研修班」，聽講反應好熱烈喎。
- 陳德霖：
- 今次有七十幾個高級銀行家參加。佢哋位位都係大忙人，平時要聚首已經唔容易，今次仲一齊「返學」上研修班，真係非常難得！
- 小森：
- 我知道呢七十幾個「同學」中，有一半係銀行總裁級人馬。坐得呢啲位都係金融界專才，仲有乜要研修呀？
- 陳德霖：
- 學海無涯嘛！研修班內容都好充實，三日嘅課程我哋探討中國宏觀形勢、兩地銀行業嘅發展、銀行監管同金融科技帶來嘅挑戰，亦請到頂級專家講中國嘅經濟發展同外交策略等。香港銀行要持續發展，就要「內外兼修」，既要全面掌握世界局勢，又要深入了解內地發展，咁先至可以有長遠同廣闊嘅視野。
- 小森：
- 陳總你又一齊去研修，係咪去做訓導主任？
- 陳德霖：
- 講笑！金管局經常鼓勵銀行業界終身學習，自己都要坐言起行，不時補補課。
- 小森：
- 其實今次唔係金管局同中銀監第一次合辦咁高層次研修班，二○一五、二○一六年分別喺北京同西安舉辦過「銀行非執行董事研修班」，口碑非常好。
- 陳德霖：
- 今次有少少分別，係以高層管理人員作為對象。
- 小森：
- 睇張合照都知陣容鼎盛，陳總幾時再帶隊？
- 陳德霖：
- 一定有機會，到時話你知！
圖片說明：超過七十位銀行高層齊齊進修，應該係香港銀行界第一次！中銀監主席郭樹清（前行中）亦有出席與「同學」交流互動。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
