接聽Phone雲

小森阿四專欄

2018年09月07日

接聽Phone雲

劉經理
(小森):
小姐你好,我係XX銀行劉經理,想介紹一個必賺嘅投資計劃畀你,呢個投資計劃叫「奪命金」!                      

 

阿四:
咪住先,由2015年開始,金管局規定銀行職員致電畀客戶時,必須先講出自己全名,同埋提供電話分機號碼、直線號碼,或者員工編號,用嚟做該名職員嘅「識別號碼」㗎喎。

 

劉經理
(小森):
你把握賺錢機會,緊要過知我個名!呢個「奪命金」必賺計劃只限今日認購。仲諗?快啲畀你嘅個人資料我,手快有啊!

 

阿四:
金管局教落,收到聲稱銀行職員嘅來電,唔好即刻相信對方嘅身份,喺提供任何個人資料前,應該打去相關銀行嘅客戶熱線,核實來電者嘅身份。講咗咁耐,你都唔肯提供自己嘅「識別號碼」,我點知你真定假㗎,我收線啦!

 

小森:
咪住阿四,我係小森!頭先假扮銀行職員,測試下你有冇對偽冒銀行來電保持警覺。你都知電話騙案時有發生,特別喺聽到對方提出「必賺投資」、「超平借貸利率優惠」呢啲字眼時,就要份外小心,通常唔會「有大隻蛤乸隨街跳」。

 

阿四:
騙徒唔單止利誘市民開戶投資或者存錢到指定戶口等,有時仲會冒充銀行職員,以銀行或信用卡戶口有問題做理由,套取市民嘅敏感個人資料。總之,接到可疑電話,就應該即刻打去銀行熱線問清楚。若果懷疑誤墮騙案,就應該即刻聯絡銀行,並且向任何一間警署或香港警務處(電話號碼︰2860 5012)報案。至於全港零售銀行嘅核實來電者身份熱線電話嘅清單,可以喺金管局「小心偽冒來電及手機短訊」(https://www.hkma.gov.hk/chi/other-information/bogus-phone-calls.shtml)專頁搵到,或者掃瞄以下二維碼。

「全港零售銀行嘅核實來電者身份熱線電話」清單

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年09月07日