接听Phone云

小森阿四專欄

2018年09月07日

接听Phone云

刘经理
(小森):
小姐你好,我系XX银行刘经理,想介绍一个必赚嘅投资计划畀你,呢个投资计划叫「夺命金」!                      

 

阿四:
咪住先,由2015年开始,金管局规定银行职员致电畀客户时,必须先讲出自己全名,同埋提供电话分机号码、直线号码,或者员工编号,用嚟做该名职员嘅「识别号码」㗎喎。

 

刘经理
(小森):
你把握赚钱机会,紧要过知我个名!呢个「夺命金」必赚计划只限今日认购。仲谂?快啲畀你嘅个人资料我,手快有啊!

 

阿四:
金管局教落,收到声称银行职员嘅来电,唔好即刻相信对方嘅身份,喺提供任何个人资料前,应该打去相关银行嘅客户热线,核实来电者嘅身份。讲咗咁耐,你都唔肯提供自己嘅「识别号码」,我点知你真定假㗎,我收线啦!

 

小森:
咪住阿四,我系小森!头先假扮银行职员,测试下你有冇对伪冒银行来电保持警觉。你都知电话骗案时有发生,特别喺听到对方提出「必赚投资」、「超平借贷利率优惠」呢啲字眼时,就要份外小心,通常唔会「有大只蛤乸随街跳」。

 

阿四:
骗徒唔单止利诱市民开户投资或者存钱到指定户口等,有时仲会冒充银行职员,以银行或信用卡户口有问题做理由,套取市民嘅敏感个人资料。总之,接到可疑电话,就应该即刻打去银行热线问清楚。若果怀疑误堕骗案,就应该即刻联络银行,并且向任何一间警署或香港警务处(电话号码∶2860 5012)报案。至于全港零售银行嘅核实来电者身份热线电话嘅清单,可以喺金管局「小心伪冒来电及手机短讯」(https://www.hkma.gov.hk/chi/other-information/bogus-phone-calls.shtml)专页搵到,或者扫瞄以下二维码。

「全港零售银行嘅核实来电者身份热线电话」清单

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年09月07日