嚟金管局實習!

小森阿四專欄

2018年01月26日

嚟金管局實習!

 

阿四:
小森,我哋喺度介紹過金融科技、私人銀行嘅實習工作,好似無介紹過金管局嘅實習機會喎。

 

小森:
你問得啱時候。金管局每年為大學生提供夏季、冬季兩次實習機會。夏季實習已經接受申請喇,喺金管局網站可以搵到申請表格。

 

阿四:
金管局實習做啲乜㗎?

 

小森:
金管局有四大職能,所以工作好多元化,由維持貨幣穩定、管理外匯基金、監管銀行、金融科技,以至市場發展等。實習生會獲派去唔同部門,同我哋同事一齊合作,仲有機會幫手處理一啲專題項目,體驗喺金融管理部門呢類獨特機構嘅工作性質。

 

阿四:
唔係讀金融科嘅同學,係咪都可以申請?

 

小森:
我哋歡迎修讀任何科目嘅大學本科生申請,本地同海外大學都得!有興趣同學可以即時網上報名,記得除咗要交個人資料外,仲要喺網上報名表格按指示寫一篇短文。入圍同學之後要參加面試,再作選拔。

 

阿四:
喺金管局做過實習,份CV(履歷表)都靚仔啲。

 

小森:
唔係「砌」CV咁簡單。做得好,隨時係事業嘅起步點!我哋都有唔少同事曾經做過實習生㗎。好似風險管理及監察部Doris,做完實習生後,就申請金管局見習經理(MT),結果成功獲聘,短短兩年,而家已經係經理級人馬啦!

 

阿四:
做過實習,考MT會着數啲㗎?

 

小森:
招聘都係公平競爭,不過做過實習嘅話,對金管局認識多咗,面試表現可能更有自信、更得心應手。我同Doris傾過,佢話實習日子雖短,但有助佢了解多啲金管局嘅工作同文化,日後做MT都快啲上手。佢仲寄語有意嚟實習嘅同學,要好似海綿咁,工作時盡量涉獵多啲、探索多啲,用心工作裝備好自己。

 

阿四:
金管局實習人工有幾多?

 

小森:
想知就去金管局以下網頁搵答案啦!有興趣同學亦要快手,2月16日就截止申請。 http://www.hkma.gov.hk/chi/about-the-hkma/careers-hkma/internship.shtml

金管局實習生網頁QR code
金管局實習生網頁QR code

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年01月26日