嚟金管局实习!

小森阿四專欄

2018年01月26日

嚟金管局实习!

 

阿四:
小森,我哋喺度介绍过金融科技、私人银行嘅实习工作,好似无介绍过金管局嘅实习机会喎。

 

小森:
你问得啱时候。金管局每年为大学生提供夏季、冬季两次实习机会。夏季实习已经接受申请喇,喺金管局网站可以搵到申请表格。

 

阿四:
金管局实习做啲乜㗎?

 

小森:
金管局有四大职能,所以工作好多元化,由维持货币稳定、管理外汇基金、监管银行、金融科技,以至市场发展等。实习生会获派去唔同部门,同我哋同事一齐合作,仲有机会帮手处理一啲专题项目,体验喺金融管理部门呢类独特机构嘅工作性质。

 

阿四:
唔系读金融科嘅同学,系咪都可以申请?

 

小森:
我哋欢迎修读任何科目嘅大学本科生申请,本地同海外大学都得!有兴趣同学可以即时网上报名,记得除咗要交个人资料外,仲要喺网上报名表格按指示写一篇短文。入围同学之后要参加面试,再作选拔。

 

阿四:
喺金管局做过实习,份CV(履历表)都靓仔啲。

 

小森:
唔系「砌」CV咁简单。做得好,随时系事业嘅起步点!我哋都有唔少同事曾经做过实习生㗎。好似风险管理及监察部Doris,做完实习生后,就申请金管局见习经理(MT),结果成功获聘,短短两年,而家已经系经理级人马啦!

 

阿四:
做过实习,考MT会着数啲㗎?

 

小森:
招聘都系公平竞争,不过做过实习嘅话,对金管局认识多咗,面试表现可能更有自信、更得心应手。我同Doris倾过,佢话实习日子虽短,但有助佢了解多啲金管局嘅工作同文化,日后做MT都快啲上手。佢仲寄语有意嚟实习嘅同学,要好似海绵咁,工作时尽量涉猎多啲、探索多啲,用心工作装备好自己。

 

阿四:
金管局实习人工有几多?

 

小森:
想知就去金管局以下网页搵答案啦!有兴趣同学亦要快手,2月16日就截止申请。 http://www.hkma.gov.hk/chi/about-the-hkma/careers-hkma/internship.shtml

金管局实习生网页QR code
金管局实习生网页QR code

想问多啲有关金管局工作,欢迎电邮到小森、阿四专用邮箱:
88hkma@hkma.gov.hk

最新小森阿四專欄
修订日期 : 2018年01月26日