- 小森：
- 我哋上篇講到聯繫匯率屬於「貨幣發行局」制度，其實係乜嚟？
- 阿四：
- 貨幣發行局制度係固定匯率嘅一種設計，最大特點就係貨幣基礎要有外匯儲備嘅十足支持，即係我哋發行嘅港元會有等值嘅美元資產放喺儲備，唔係篤下手指就印得！三間發鈔銀行如果要印港紙，必須先以7.8港元兌1美金呢個固定匯價向金管局繳交等值嘅美元，存入外匯基金。
- 小森：
- 強方/弱方兌換保證，又係乜嚟呢？
- 阿四：
- 除咗發鈔銀行用7.8呢個固定匯價印港紙，金管局亦同香港所有銀行保證港元與美元之間按固定匯率自由同無上限兌換，而兌換匯價亦按實際運作需要，設置7.75至7.85嘅上下浮動區間。金管局就好似一間廿四小時、年中無休嘅超級兌換店咁。當市場對港元需求好大，港元兌美元匯率轉強去到7.75時，而銀行又無足夠港紙，就可以嚟金管局兌換，我哋保證以1美元兌7.75港元呢個「強方兌換保證」匯價，買入銀行手上美金，兌等值港紙畀佢哋。而「弱方兌換保證」就相反，當市場對港元需求下降，港匯去到7.85時，銀行想將手上嘅港元換返做美金時，金管局就保證以1美元兌7.85港元嘅匯價同佢哋換。
- 小森：
- 點解咁樣就可以確保港元匯率穩定呢？
- 阿四：
- 就算有幾多資金流入都好，因為金管局保證會無上限向銀行買入美元/賣出港元，令港元升到7.75紅線就會止步，港元供應增加咗，匯價自然就會回穩；相反，當好多資金流出港元嗰陣，港元跌到7.85又會止步，因為我哋買入港元/賣出美元，令港元供應減少，匯價最終會轉強。
- 小森：
- 唔怪得早排陳總話，聯匯嘅設計係預咗港元轉弱時，就會觸及到弱方兌換保證，並唔存在金管局唔想見到港匯貶值到7.85嘅情況。
- 阿四：
- 聯匯制度設計勝在清晰明確，每次當金管局入市都要即時向外公布，透明度極高。香港過去三十幾年經歷過咁多大風浪，港元貨幣都保持穩定，聯匯嘅公信力就係咁累積得嚟㗎。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
