- 小森：
- 我哋上篇讲到联系汇率属于「货币发行局」制度，其实系乜嚟？
- 阿四：
- 货币发行局制度系固定汇率嘅一种设计，最大特点就系货币基础要有外汇储备嘅十足支持，即系我哋发行嘅港元会有等值嘅美元资产放喺储备，唔系笃下手指就印得！三间发钞银行如果要印港纸，必须先以7.8港元兑1美金呢个固定汇价向金管局缴交等值嘅美元，存入外汇基金。
- 小森：
- 强方/弱方兑换保证，又系乜嚟呢？
- 阿四：
- 除咗发钞银行用7.8呢个固定汇价印港纸，金管局亦同香港所有银行保证港元与美元之间按固定汇率自由同无上限兑换，而兑换汇价亦按实际运作需要，设置7.75至7.85嘅上下浮动区间。金管局就好似一间廿四小时、年中无休嘅超级兑换店咁。当市场对港元需求好大，港元兑美元汇率转强去到7.75时，而银行又无足够港纸，就可以嚟金管局兑换，我哋保证以1美元兑7.75港元呢个「强方兑换保证」汇价，买入银行手上美金，兑等值港纸畀佢哋。而「弱方兑换保证」就相反，当市场对港元需求下降，港汇去到7.85时，银行想将手上嘅港元换返做美金时，金管局就保证以1美元兑7.85港元嘅汇价同佢哋换。
- 小森：
- 点解咁样就可以确保港元汇率稳定呢？
- 阿四：
- 就算有几多资金流入都好，因为金管局保证会无上限向银行买入美元/卖出港元，令港元升到7.75红线就会止步，港元供应增加咗，汇价自然就会回稳；相反，当好多资金流出港元嗰阵，港元跌到7.85又会止步，因为我哋买入港元/卖出美元，令港元供应减少，汇价最终会转强。
- 小森：
- 唔怪得早排陈总话，联汇嘅设计系预咗港元转弱时，就会触及到弱方兑换保证，并唔存在金管局唔想见到港汇贬值到7.85嘅情况。
- 阿四：
- 联汇制度设计胜在清晰明确，每次当金管局入市都要即时向外公布，透明度极高。香港过去三十几年经历过咁多大风浪，港元货币都保持稳定，联汇嘅公信力就系咁累积得嚟㗎。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
