- 阿四：
- 有位uncle同我講，話佢間公司最近去銀行借錢時，銀行要求佢同意將公司嘅信貸紀錄提交去商業信貸資料庫。佢問點解銀行過去都無咁嘅要求，而家叫佢加入信貸資料庫？
- 小森：
- 商業信貸資料庫唔係新事物，早喺二○○四年推出，涵蓋年度營業額五千萬元或以下非上市有限公司嘅信貸資料。由今日（十二月一日）開始，商業信貸資料庫涵蓋範圍擴闊到年度營業額一億元或以下非上市有限公司，令資料庫更切合市場所需。
- 阿四：
- 不過我uncle擔心同意提交信貸紀錄後，公司嘅資料畀人睇晒。
- 小森：
- 唔使驚，只有喺信貸審批、檢討或續期、或者因為間公司出現拖欠嘅情況，銀行先可以向商業信貸資料庫查閱間公司嘅資料，唔可以為咗做市場推廣而查㗎！另外，商業信貸資料庫收錄公司嘅商業登記證號碼、不同信貸類別嘅總授信額、有冇為信貸做抵押，同埋欠款紀錄等，唔會收錄公司資產總值、股東個人資產等資料。
- 阿四：
- 我知道信貸資料庫幫到銀行了解借貸人紀錄，從而加強管理信貸風險，但對貸款人又有乜好處？
- 小森：
- 準時清還貸款，建立良好信貸紀錄係非常重要。銀行見到企業信貸紀錄「靚仔」，借錢時都大啲機會貸款條件好啲、批核快啲啦！
- 阿四：
- 商業信貸資料庫嘅紀錄保存幾耐？
- 小森：
- 一般嚟講，有限公司嘅每項信貸資料，會由該項信貸完全清還個日計起儲五年。資料庫會將過時嘅資料由系統刪走㗎。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
