- 小森：
- 金管局又開始請MT（見習經理）啦！
- 阿四：
- 聽聞去年超過2,000人申請，結果6位成功入職。其實係咪要專攻金融嘅申請人至有機？
- 小森：
- 根據過去經驗，申請人當中修讀經濟、金融、商科嘅同學較多，但我哋都有請其他課程嘅同學。金管局希望覓得「通才」做MT，培育佢哋做未來管理骨幹。申請人只要係大學畢業生，工作經驗不拘，最重要係思考同分析能力強、對數字敏感、語文同溝通能力好，當然最重要係對公共政策同服務社會有熱誠，具團隊合作精神。而且，MT需要輪流喺唔同部門工作，講求學習同適應能力。
- 阿四：
- 報考MT要過幾多關？
- 小森：
- 申請人遞交表格時，要交一篇三百字短文，睇下佢哋對呢份工嘅誠意同埋文字水平。獲選中嘅申請人，就要進行小組討論、筆試、仲有起碼兩輪面試。
- 阿四：
- 問題會唔會好刁鑽？
- 小森：
- 都幾考綜合能力㗎，主要睇下考生有幾了解金管局嘅工作，同埋對國際本地時事、同公眾關心課題有乜見解。面試時最緊要有自己嘅睇法，切忌背書！
- 阿四：
- MT成功獲聘就會開始兩年嘅在職培訓，輪流喺兩至三個部門工作，涉足同銀行監管、聯繫匯率、外匯基金、金融科技、風險管理等相關工作。中間仲加插唔少課堂培訓。完成後就晉升做經理。
- 小森：
- 仲有一份「筍工」，就係金管局嘅見習經濟師。招聘對象係以修讀經濟或金融相關學科嘅碩士生或博士生為主，見習經濟師會喺兩至三個不同部門負責經濟研究或宏觀金融狀況嘅監察工作。培訓完成後，就晉升做經濟師！
- 阿四：
- 講咁耐，未講兩份工作待遇係點。
- 小森：
- 兩份工作月薪都係由四萬蚊起，仲有以工作表現掛鈎嘅浮動薪酬，亦有完善嘅福利制度，唔差㗎。
- 阿四：
- 幾時截止報名？
- 小森：
- MT計劃10月21日就截止，見習經濟師就12月31日截止，有興趣可以掃瞄QR code了解詳情同埋MT過來人經驗分享！
金管局見習經理計劃QR Code
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
