- 精明大使：
- 阿四，聽講你下星期去日本旅行喎。
- 阿四：
- 我仲煩緊旅行簽信用卡，究竟揀以港紙定外幣找數先至夠精明？
- 精明大使：
- 如果揀外幣找數，發卡銀行會收取相等簽帳額0%至2.5%嘅手續費，當中包括信用卡組織嘅收費。外幣兌港紙嘅匯價唔係用簽帳日計，而係信用卡組織完成處理交易個日計，你要收到月結單先知道匯價。
- 阿四：
- 係咪揀港紙找數方便啲，簽帳時即刻知道兌換率。
- 精明大使：
- 揀港紙簽帳可以即時鎖定匯價，但你同樣面對簽賬後外幣匯率貶值嘅風險。而且提提你，呢種「動態貨幣兌換」（Dynamic Currency Conversion, DCC）服務嘅匯價會喺簽賬時嘅兌換匯率再加上額外兌換差價，大約2.5%至4%，有啲地方嘅兌換差價可能仲高。另外亦可能要繳付信用卡組織透過發卡銀行收取簽帳額0.8%至1%嘅跨境交易收費。此外，少數發卡銀行再會收取大約0.2%至0.95%嘅額外手續費。
- 阿四：
- 聽完一大堆數字，即係邊樣着數啲？
- 精明大使：
- 視乎你自己需要啦。揀港紙可以即時鎖定匯價，唔使心掛掛，但就有較多收費；如果你唔介意匯價波動，揀外幣簽帳就啱你，因為使費就無咁多。精明嘅做法係出發前向銀行問清楚外幣同港紙簽帳嘅不同收費，喺海外揀港紙簽帳前再問清楚商戶用嘅匯率同埋仲有甚麼收費，計好數先作決定。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
