- 精明大使：
- 阿四，听讲你下星期去日本旅行喎。
- 阿四：
- 我仲烦紧旅行签信用卡，究竟拣以港纸定外币找数先至够精明？
- 精明大使：
- 如果拣外币找数，发卡银行会收取相等签帐额0%至2.5%嘅手续费，当中包括信用卡组织嘅收费。外币兑港纸嘅汇价唔系用签帐日计，而系信用卡组织完成处理交易个日计，你要收到月结单先知道汇价。
- 阿四：
- 系咪拣港纸找数方便啲，签帐时即刻知道兑换率。
- 精明大使：
- 拣港纸签帐可以即时锁定汇价，但你同样面对签账后外币汇率贬值嘅风险。而且提提你，呢种「动态货币兑换」（Dynamic Currency Conversion, DCC）服务嘅汇价会喺签账时嘅兑换汇率再加上额外兑换差价，大约2.5%至4%，有啲地方嘅兑换差价可能仲高。另外亦可能要缴付信用卡组织透过发卡银行收取签帐额0.8%至1%嘅跨境交易收费。此外，少数发卡银行再会收取大约0.2%至0.95%嘅额外手续费。
- 阿四：
- 听完一大堆数字，即系边样着数啲？
- 精明大使：
- 视乎你自己需要啦。拣港纸可以即时锁定汇价，唔使心挂挂，但就有较多收费；如果你唔介意汇价波动，拣外币签帐就啱你，因为使费就无咁多。精明嘅做法系出发前向银行问清楚外币同港纸签帐嘅不同收费，喺海外拣港纸签帐前再问清楚商户用嘅汇率同埋仲有什么收费，计好数先作决定。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
