中小企慳錢神器

小森：

「各位中小企朋友，今日我想同大家介紹返一件慳錢神器，唔單止可以幫各位慳錢、慳時間，仲慳埋電匯返廣東省嘅使費。呢件神器就係登登登凳…電子支票啦！」阿四你覺得我呢段介紹電子支票嘅開場白點呀？

阿四：

電子支票係方便嘅，但叫做神器係咪有啲誇？

小森：

一啲都唔誇，中小企如果用電子支票代替實體支票，真係可以慳唔少㗎。用寄支票嘅郵費做例子，本地平郵最平要一個七，小數怕長計，改用電子支票嘅話，就可以慳返筆郵費。

阿四：

唔止開票，入票都係成本！收到傳統支票，公司要派同事去銀行入票，人多仲要排隊等候。用電子支票就無呢啲煩惱，同事可以將時間用嚟做其他更有效益嘅工作。

小森：

有啲公司會叫客戶入票後，再掃描或傳真入票紙過去，等公司職員核實返邊個客戶過咗邊條數。而電子支票可以用電郵收發，客戶入票過數嘅資料一目了然。

阿四：

我不時都睇新聞見到員工冒簽支票「穿櫃桶底」嘅報道，用電子支票會唔會好牙煙㗎？

小森：

比起實體支票，電子支票安全好多！電子支票唔使手寫簽名，而係用數碼簽署，咁就可以減低支票被人盜用或者冒簽嘅風險啦。

阿四：

頭先你話用電子支票可以慳返電匯使費，又係咩玩法呢？

小森：

舊年七月開始電子支票可以跨境支付，由香港銀行發出嘅電子支票可以存入廣東省約50 間指定銀行。中小企找數畀內地供應商通常用電匯，每筆匯款都要收費。如果轉用電子支票就可以慳返呢筆錢，而且用港幣、人民幣、美元支付一樣得。

阿四：

小森，其實你個開場白係打算幾時講呢？

小森：

今個周末開始金管局會喺商場舉辦電子支票巡迴展覽，現場會有學生大使講解，仲有互動示範同遊戲玩，所以我準備下講稿。想了解多啲電子支票嘅朋友，千祈唔好錯過呀！

金管局電子支票商場巡迴展覽時間表

 
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk