中小企悭钱神器

小森：

「各位中小企朋友，今日我想同大家介绍返一件悭钱神器，唔单止可以帮各位悭钱、悭时间，仲悭埋电汇返广东省嘅使费。呢件神器就系登登登凳…电子支票啦！」阿四你觉得我呢段介绍电子支票嘅开场白点呀？

阿四：

电子支票系方便嘅，但叫做神器系咪有啲夸？

小森：

一啲都唔夸，中小企如果用电子支票代替实体支票，真系可以悭唔少㗎。用寄支票嘅邮费做例子，本地平邮最平要一个七，小数怕长计，改用电子支票嘅话，就可以悭返笔邮费。

阿四：

唔止开票，入票都系成本！收到传统支票，公司要派同事去银行入票，人多仲要排队等候。用电子支票就无呢啲烦恼，同事可以将时间用嚟做其他更有效益嘅工作。

小森：

有啲公司会叫客户入票后，再扫描或传真入票纸过去，等公司职员核实返边个客户过咗边条数。而电子支票可以用电邮收发，客户入票过数嘅资料一目了然。

阿四：

我不时都睇新闻见到员工冒签支票「穿柜桶底」嘅报道，用电子支票会唔会好牙烟㗎？

小森：

比起实体支票，电子支票安全好多！电子支票唔使手写签名，而系用数码签署，咁就可以减低支票被人盗用或者冒签嘅风险啦。

阿四：

头先你话用电子支票可以悭返电汇使费，又系咩玩法呢？

小森：

旧年七月开始电子支票可以跨境支付，由香港银行发出嘅电子支票可以存入广东省约50 间指定银行。中小企找数畀内地供应商通常用电汇，每笔汇款都要收费。如果转用电子支票就可以悭返呢笔钱，而且用港币、人民币、美元支付一样得。

阿四：

小森，其实你个开场白系打算几时讲呢？

小森：

今个周末开始金管局会喺商场举办电子支票巡回展览，现场会有学生大使讲解，仲有互动示范同游戏玩，所以我准备下讲稿。想了解多啲电子支票嘅朋友，千祈唔好错过呀！

金管局电子支票商场巡回展览时间表

 
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk