- 小森：
- 金管局網站今日開咗「開戶難？」專頁，解答個人同公司開戶可能遇到嘅問題，你睇咗未？
- 阿四：
- 未喎。我知近排好多人關心開戶難嘅問題，呢個專頁點幫到用家呢？
- 小森：
- 呢個網頁列咗好多開戶貼士，包括有開戶所需資料同流程、客戶被拒開戶點做，同埋列舉一啲銀行處理開戶時唔應該做嘅事，方便有意開戶嘅用家參考。金管局仲新開一個專用郵箱accountopening@hkma.gov.hk，處理有關開立戶口或維持戶口嘅意見或疑問，遲啲仲有電話熱線㖭。
- 阿四：
- 香港開戶真係咁難？
- 小森：
- 自從國際社會早幾年開始大力加強打擊洗錢、恐怖分子資金籌集、逃稅等不法行為，銀行因而須要遵守國際各種更嚴謹嘅監管要求，開戶真係無以前咁易㗎嘞，呢個係世界各地都面對嘅問題，並唔係香港獨有。對香港嚟講，個別國際性銀行因要兼顧海外監管機構同總部嘅要求，情況較複雜，所以佢哋拒絕開戶嘅數字可能稍高。
- 阿四：
- 金管局喺開戶方面做咗乜嘢工作呢？
- 小森：
- 金管局十分重視開戶難嘅問題，過去一段時間見咗好多商界代表，非常全面咁收集意見。陳總喺舊年九月向全港銀行發出指引，要求銀行要妥善執行「風險為本」方法處理開戶嘅問題。
- 阿四：
- 「風險為本」係乜嚟㗎？
- 小森：
- 「風險為本」係國際打擊洗錢、恐怖分子資金籌集方面嘅重要原則。簡單嚟講，每個客戶嘅背景都唔同，喺洗錢、恐怖分子資金籌集方面嘅風險亦會有高有低。銀行透過有效嘅風險評估可以區分個別客戶嘅風險，實施同客戶風險水平相稱嘅開戶要求。相反，如果銀行一刀切咁用同樣高標準去處理風險水平不同的客戶開戶申請，咁就唔係「風險為本」囉。
- 阿四：
- 開戶難情況有冇改善到呢？
- 小森：
- 當然有啦。銀行因應金管局嘅指引而改善咗開戶口嘅措施，例如開戶申請被拒嘅比率有所下降，又縮短咗手續時間，現時有三份二嘅開戶個案喺十五日內完成，大約九成喺一個月內完成。銀行亦要同客戶講返戶口申請最新進度，增加透明度。而家每個月新開的企業戶口大約有一萬個，當中七成係中小企同初創企業，海外中小企同初創企業都佔兩成。另外一個唔講唔知嘅改善措施，就係銀行都已經設立覆核機制，如開戶被拒，可以「上訴」㗎！金管局遲啲仲會安排喬裝客戶去銀行開戶口，睇下前線員工落實改善措施嘅成效。
- 阿四：
- 有意開戶口嘅朋友快啲睇「開戶難？」專頁，攞返幾個開戶貼士。開戶時遇到唔合理嘅要求，記得電郵畀我哋啦！
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
