- 小森：
- 金管局网站今日开咗「开户难？」专页，解答个人同公司开户可能遇到嘅问题，你睇咗未？
- 阿四：
- 未喎。我知近排好多人关心开户难嘅问题，呢个专页点帮到用家呢？
- 小森：
- 呢个网页列咗好多开户贴士，包括有开户所需资料同流程、客户被拒开户点做，同埋列举一啲银行处理开户时唔应该做嘅事，方便有意开户嘅用家参考。金管局仲新开一个专用邮箱accountopening@hkma.gov.hk，处理有关开立户口或维持户口嘅意见或疑问，迟啲仲有电话热线㖭。
- 阿四：
- 香港开户真系咁难？
- 小森：
- 自从国际社会早几年开始大力加强打击洗钱、恐怖分子资金筹集、逃税等不法行为，银行因而须要遵守国际各种更严谨嘅监管要求，开户真系无以前咁易㗎嘞，呢个系世界各地都面对嘅问题，并唔系香港独有。对香港嚟讲，个别国际性银行因要兼顾海外监管机构同总部嘅要求，情况较复杂，所以佢哋拒绝开户嘅数字可能稍高。
- 阿四：
- 金管局喺开户方面做咗乜嘢工作呢？
- 小森：
- 金管局十分重视开户难嘅问题，过去一段时间见咗好多商界代表，非常全面咁收集意见。陈总喺旧年九月向全港银行发出指引，要求银行要妥善执行「风险为本」方法处理开户嘅问题。
- 阿四：
- 「风险为本」系乜嚟㗎？
- 小森：
- 「风险为本」系国际打击洗钱、恐怖分子资金筹集方面嘅重要原则。简单嚟讲，每个客户嘅背景都唔同，喺洗钱、恐怖分子资金筹集方面嘅风险亦会有高有低。银行透过有效嘅风险评估可以区分个别客户嘅风险，实施同客户风险水平相称嘅开户要求。相反，如果银行一刀切咁用同样高标准去处理风险水平不同的客户开户申请，咁就唔系「风险为本」罗。
- 阿四：
- 开户难情况有冇改善到呢？
- 小森：
- 当然有啦。银行因应金管局嘅指引而改善咗开户口嘅措施，例如开户申请被拒嘅比率有所下降，又缩短咗手续时间，现时有三份二嘅开户个案喺十五日内完成，大约九成喺一个月内完成。银行亦要同客户讲返户口申请最新进度，增加透明度。而家每个月新开的企业户口大约有一万个，当中七成系中小企同初创企业，海外中小企同初创企业都占两成。另外一个唔讲唔知嘅改善措施，就系银行都已经设立覆核机制，如开户被拒，可以「上诉」㗎！金管局迟啲仲会安排乔装客户去银行开户口，睇下前线员工落实改善措施嘅成效。
- 阿四：
- 有意开户口嘅朋友快啲睇「开户难？」专页，攞返几个开户贴士。开户时遇到唔合理嘅要求，记得电邮畀我哋啦！
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
