銀行匯款知多啲

小森阿四專欄

2018年10月12日

銀行匯款知多啲

阿四:
唔明唔明!

 

小森:
你唔明乜呀?

 

阿四:
我啱啱去銀行匯錢,唔知點解有唔同嘅收費項目!例如「代理銀行」費用、用唔同貨幣有唔同收費、喺匯款指示加上畀收款人嘅備註又有可能要收費。仲有查詢匯款情況、取消匯款等費用,有啲可能收一、二百蚊。我以為去銀行匯款只係收一種手續費,真係收費不似預期!

 

小森:
始終每筆匯款嘅細節有唔同,未必可以有一種收費包括晒所有情況。其實好多銀行都已經將匯款嘅收費放上網頁,你可以喺辦理匯款前睇下,等自己有個預算。同埋最好喺辦理匯錢前,向銀行職員問清楚匯款所需程序同大概收費。

 

阿四:
我唔明點解銀行辦理海外匯款要搵「代理銀行」?客人可唔可以搵指定嘅「代理銀行」呢?

 

小森:
因為銀行好難同全球所有金融機構都有直接聯繫,所以需要有「代理銀行」做中間人,協助客人將資金匯去當地收款銀行。為了令有關海外匯款可以妥善辦理,每間銀行同佢用嗰間「代理銀行」一般都會互相開立帳戶做往來交收、交換認證、訂明授權安排等,唔係臨時拉伕就可以做「代理」。客人想搵某啲銀行做海外「代理銀行」嘅話,都要先問下匯款銀行有無同嗰間「代理銀行」有聯繫先得,無嘅話,就真係無法做到啦。

 

阿四:
另外我又唔明,我問銀行職員最終「代理銀行」同收款銀行要收幾多費用話答唔到;問筆錢可以幾時匯到收款銀行,佢只係答到我「一般嚟講」要收費幾多同要等幾耐,咁都得?

 

小森:
好似頭先咁講,海外匯款往往要經「代理銀行」處理,有啲同香港較少聯繫嘅地區,甚至可能要用幾間「代理銀行」。再加上時差、銀行截數時間不同等因素,所以銀行職員真係好難畀到一個確實收費同時間你,唔係耍你㗎。

 

阿四:
原來咁複雜,真係唔講唔知!

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年10月12日