做個負責任嘅銀行服務用家

小森阿四專欄

2018年08月03日

做個負責任嘅銀行服務用家

小森:
阿四,我成日醒你一啲使用銀行服務嘅精明貼士,今次就講下點樣負責任咁使用銀行服務。

 

阿四:
精明就夠啦,點解要負責任呢?

 

小森:
「精明」係識得揀更好,「負責任」其實只係對自己負責,即係識得保障自己多啲,兩者相輔相成。金管局一直推廣消費者教育工作,希望大家識得做個精明又負責任嘅銀行服務消費者。

 

阿四:
使用銀行服務要負咩責任?

 

小森:
首先銀行客戶有責任妥善使用網上銀行、電話理財同櫃員機等銀行服務,包括好好保管手機同電腦,好好保管同定期更新密碼,唔好用同其他網上服務一樣嘅密碼。隨意記錄密碼喺紙或電腦,或者用「123456」呢類好易被撞中嘅密碼,其實等如將屋企夾萬鎖匙周街放一樣咁兒戲。

 

阿四:
所以我經常睇實由銀行發出嘅手機短訊同通訊,收到月結單時必定盡快查核所有交易紀錄,睇下有冇未經授權交易。

 

小森:
第二就係有責任妥善保管個人資料。騙徒會出盡千方百計,譬如利用申請低息貸款、招聘等藉口,氹人交出身份證、住址證明、入息證明、銀行帳戶資料、簽名式樣、甚至你張相等,然後作不法用途。

 

阿四:
仲有簽任何文件前都要睇清楚。

 

小森:
另外,客戶進行銀行交易,例如喺櫃員機過數時應該小心核對輸入嘅收款帳號同埋銀碼正確無誤,免得日後追討起嚟費時失事。假如真係大頭蝦入錯數,就要盡快搵銀行協助,若對方不合作或拒絕歸還款項,就要考慮報警。仲有,如果發現自己戶口收到不明來歷嘅存款,千祈唔好貪心,一定要立即通知銀行處理,否則有機會負上刑事責任。仲想知多啲,可以去金管局網站嘅消費者資訊專區睇睇!

消費者資訊專區二維碼
消費者資訊專區二維碼消費者教育推廣計劃

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年08月03日