- 阿四：
- 聽講有唔少金融同科技公司都想喺香港開虛擬銀行，其實同傳統銀行有乜分別？
- 小森：
- 虛擬銀行主要係透過手機同電腦提供零售銀行服務，無實體分行㗎。
- 阿四：
- 又幾有趣喎，但虛擬銀行無實體分行嘅話，客戶點開戶口呀？
- 小森：
- 有好多方法㗎！好似而家有銀行提供「遙距開戶」服務咁，申請人用手機掃瞄身份證、影張自拍照，再遞交個人資料，咁就大致完成申請開戶手續，唔使再落分行。
- 阿四：
- 我最怕去銀行排隊，如果可以用手機同電腦處理所有銀行服務就最好啦。話時話，雖然我好擁抱新科技嘅，但將自己血汗錢存入虛擬銀行，諗落有啲虛。萬一有事起嚟，想上門搵個人都無。
- 小森：
- 唔使擔心，金管局有規定虛擬銀行要喺香港開設主要辦公室，唔會無晒影㗎。虛擬銀行申請牌照時要向金管局提交詳盡嘅業務計劃，而且要證明有充足財政實力，仲要接受金管局嘅監管。另外，虛擬銀行同傳統銀行一樣會參加存款保障計劃，存款有最高50萬保障！
- 阿四：
- 我又聽講虛擬銀行可以促進普及金融，點解嘅？
- 小森：
- 普及金融嘅意思係市民大眾，不論收入高低、財富多寡都可以獲得基本嘅銀行服務。虛擬銀行唔可以設立最低戶口結餘要求，或者徵收低戶口結餘收費，令小額存戶可以有多個選擇。
- 阿四：
- 幾時有虛擬銀行出現？
- 小森：
- 預計今年底或明年初發出牌照後，虛擬銀行就可以準備推出市面，一有消息再通知大家啦。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
