五招提防銀行釣魚電郵

小森阿四專欄

2018年05月25日

五招提防銀行釣魚電郵

阿四:
小森,我收到銀行電郵話我嘅網上銀行帳戶有問題,仲叫我快啲click電郵上嘅hyperlink(超連結)去更改密碼。唔知有冇「伏」? 

 

小森:
咁你要小心啲喎,呢個好可能係騙徒扮銀行寄嚟嘅釣魚電郵。 

 

阿四:
你唔使睇個電郵都知? 

 

小森:
一般嚟講,銀行係唔應該要求客戶透過電郵嘅hyperlink直接登入網上銀行或者更新資料。騙徒假扮銀行發放釣魚電郵,就係想呃你click電郵上嘅hyperlink或附件。只要你一click就可能被帶去假嘅銀行網站,你嘅登入資料同密碼就有機會被騙徒睇晒。 

 

阿四:
咁我click去望下個網站,唔輸入資料咪無事囉!

 

小森:
成日都話騙徒手法層出不窮,唔輸入資料唔代表無事。有啲釣魚電郵好有「耐性」,喺你click hyperlink時,已經不動聲色咁喺你部電腦或手機植入惡意程式,再等你日後登入真嘅網上銀行時,先至偷你嘅資料同密碼。 

 

阿四:
咁點先可以提防釣魚電郵?

 

小森:
醒你幾招啦。首先,當收到一啲要求你打開超連結或者附件嘅電郵時,唔好心急亂咁㩒;第二,要登入網上銀行嘅話,就應透過直接輸入銀行網址、書籤或網上銀行流動應用程式(App)登入;第三,避免透過公用電腦或公共無線網絡登入網上銀行;第四,就係留意登入銀行網頁個陣有冇異樣,例如有可疑嘅視窗彈出、或者額外要求輸入個人資料等。 

 

阿四:
仲有一招!金管局會發放有關欺詐銀行網站同偽冒電郵嘅最新資料,可以喺呢個網址睇到晒!http://www.hkma.gov.hk/chi/other-information/fraudulent-bank-websites.shtml

 

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年05月25日