潮搭的士

小森阿四專欄

2018年04月06日

潮搭的士


阿四:
前幾日我搭的士,遇到一部可以選擇用電子錢包支付車費嘅的士。司機大佬收得好爽手,確係幾方便。

小森:
自從金管局2016年發出儲值支付工具牌照以嚟,香港嘅電子錢包迅速發展,應用範圍愈來愈闊。而家香港大約有幾千部的士接受電子支付方式,等乘客有更多選擇。

阿四:
唔止搭的士有得揀,部分街市亦已經引入咗電子支付,買魚買菜買肉都可以揀用電子錢包畀錢,唔使再收到「濕立立」嘅散紙同散銀喇。無論係商戶定係顧客,大家都方便咗。

小森:
係呀!仲有,而家去寺廟都仲可以用手機「嘟」一下添香油錢㖭!

阿四:
話就話電子錢包用途多咗,事實上係咪多咗人用㗎?

小森:
睇數據就最客觀。2017年第四季(即10月至12月)儲值支付工具總交易量比2016年同期有明顯的增長。值得留意嘅係,當中個人對個人轉帳(P2P)增加咗9倍咁多,去到254萬宗,而2017年第四季P2P交易金額大約14.3億元,按年上升大約1.7倍!呢組數字反映市民對用電子錢包愈來愈受落。

阿四:
等到今年稍後時間,快速支付系統都推出嘅話,到時P2P可以做到跨行即時轉帳,咁就更加方便啦!

 

圖片來源:嗇色園



想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2018年04月06日