- 小森：
- 阿四，我哋寫咗呢個專欄都一段時間，好似未講過聯繫匯率喎。呢個貨幣制度係香港經濟嘅定海神針，你知幾多？
- 阿四：
- 聯匯我好熟，隨便問。
- 小森：
- 香港點解要喺1983年實施聯繫匯率？
- 阿四：
- 咁要白頭宮女話當年嘞。八十年代初香港前途問題引發咗信心危機，導致港元一年就貶值咗大約四成！個陣好多市民擔心港元唔見使，於是爭相搶購日常品、去銀行提取存款，有銀行仲因為出現擠提而被政府接管。為咗穩定民心，港府喺1983年10月17日實施聯繫匯率，將港元滙價定係1美金兌7.8港元水平，用「貨幣發行局」制度運作，一直用到而家。呢三十幾年，雖然出現過唔同危機，例如87股災、97亞洲金融危機、2001年美國「911」、2008年全球金融危機等，港元匯率都一直安然無恙。
- 小森：
- 你又知唔知實施聯匯前，港元曾經同過邊啲貨幣掛鈎？
- 阿四：
- 我知，喺1863年港府宣布銀元為法定貨幣，實行銀本位制度。直至1935年，因為發生全球白銀危機，白銀大量外流，港府就宣布港元同英鎊掛鈎，將匯率定係1英鎊兌16港元。雖然其間有調整過掛鈎匯價，但呢個掛鈎英鎊制度一直維持咗37年。去到1972年，英國政府決定畀英鎊自由浮動，於是港元改同美金掛鈎。不過兩年之後，多國改行自由浮動制度，港元亦都加入，直至實施聯繫匯率為止。
- 小森：
- 所以港元自由浮動嘅時間大約只有9年㗎咋。頭先你提到「貨幣發行局」制度又係乜東東?
- 阿四：
- 我哋下篇再講。
港元匯率制度歷史
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
