- 小森：
- 阿四，我哋写咗呢个专栏都一段时间，好似未讲过联系汇率喎。呢个货币制度系香港经济嘅定海神针，你知几多？
- 阿四：
- 联汇我好熟，随便问。
- 小森：
- 香港点解要喺1983年实施联系汇率？
- 阿四：
- 咁要白头宫女话当年嘞。八十年代初香港前途问题引发咗信心危机，导致港元一年就贬值咗大约四成！个阵好多市民担心港元唔见使，于是争相抢购日常品、去银行提取存款，有银行仲因为出现挤提而被政府接管。为咗稳定民心，港府喺1983年10月17日实施联系汇率，将港元汇价定系1美金兑7.8港元水平，用「货币发行局」制度运作，一直用到而家。呢三十几年，虽然出现过唔同危机，例如87股灾、97亚洲金融危机、2001年美国「911」、2008年全球金融危机等，港元汇率都一直安然无恙。
- 小森：
- 你又知唔知实施联汇前，港元曾经同过边啲货币挂鈎？
- 阿四：
- 我知，喺1863年港府宣布银元为法定货币，实行银本位制度。直至1935年，因为发生全球白银危机，白银大量外流，港府就宣布港元同英镑挂鈎，将汇率定系1英镑兑16港元。虽然其间有调整过挂鈎汇价，但呢个挂鈎英镑制度一直维持咗37年。去到1972年，英国政府决定畀英镑自由浮动，于是港元改同美金挂鈎。不过两年之后，多国改行自由浮动制度，港元亦都加入，直至实施联系汇率为止。
- 小森：
- 所以港元自由浮动嘅时间大约只有9年㗎咋。头先你提到「货币发行局」制度又系乜东东?
- 阿四：
- 我哋下篇再讲。
港元汇率制度历史
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
