大學生點揀信用卡

阿四：

我表妹前幾日參加完大學迎新營，攞咗四、五張信用卡申請表格。佢話每張卡嘅迎新禮物望落都好吸引，有戲飛、健康手環、同埋VR眼鏡！佢諗住全部都申請。

小森：

四、五張係咪太多呀？萬一唔覺意使大咗，每個月又只係還min pay（最低還款額），又或者遲咗找卡數被罰息罰款，咁就攞幾多迎新禮物都補唔返。

阿四：

我有提醒表妹，佢而家無固定收入，每月只還min pay條數有幾襟計：月息2.5%，實際年利率就係35%。假設卡數兩萬蚊，每月只還min pay，就算再無新簽帳，都要還26年先清晒，淨畀利息就4.7萬蚊，係本金嘅兩倍有多。

小森：

有啲人鼓吹欠卡數好小事，大不了申請破產，四年破產自動解除後又一條好漢。千祈咪咁諗，信貸紀錄劃花咗，日後再想借錢都難咗，甚至影響到搵工，因為有啲僱主係唔請破過產嘅人。

阿四：

金管局喺2011年要求銀行將大學生信用額上限設喺一萬蚊，就係希望防止因濫用信用卡而孭一身債。我會勸表妹諗清楚至申請信用卡，仲要每月記得準時清卡數。

小森：

記住：借定唔借，還得到先好借！

                           只還「最低還款額」的利息成本

想問多啲有關金管局工作，歡迎電郵到小森、阿四專用郵箱：
88hkma@hkma.gov.hk