大学生点拣信用卡

阿四：

我表妹前几日参加完大学迎新营，攞咗四、五张信用卡申请表格。佢话每张卡嘅迎新礼物望落都好吸引，有戏飞、健康手环、同埋VR眼镜！佢谂住全部都申请。

小森：

四、五张系咪太多呀？万一唔觉意使大咗，每个月又只系还min pay（最低还款额），又或者迟咗找卡数被罚息罚款，咁就攞几多迎新礼物都补唔返。

阿四：

我有提醒表妹，佢而家无固定收入，每月只还min pay条数有几襟计：月息2.5%，实际年利率就系35%。假设卡数两万蚊，每月只还min pay，就算再无新签帐，都要还26年先清晒，净畀利息就4.7万蚊，系本金嘅两倍有多。

小森：

有啲人鼓吹欠卡数好小事，大不了申请破产，四年破产自动解除后又一条好汉。千祈咪咁谂，信贷纪录划花咗，日后再想借钱都难咗，甚至影响到搵工，因为有啲雇主系唔请破过产嘅人。

阿四：

金管局喺2011年要求银行将大学生信用额上限设喺一万蚊，就系希望防止因滥用信用卡而孭一身债。我会劝表妹谂清楚至申请信用卡，仲要每月记得准时清卡数。

小森：

记住：借定唔借，还得到先好借！

                           只还「最低还款额」的利息成本

想问多啲有关金管局工作，欢迎电邮到小森、阿四专用邮箱：
88hkma@hkma.gov.hk