- 阿四：
- 金管局最近成立咗處置機制辦公室，查實「處置」係乜東東？
- 小森：
- 2008年全球金融危機時，各地政府擔心金融機構倒閉會波及整個金融體系，於是動用天文數字嘅公帑拯救「大得不能倒」金融機構，呢種「佢請客，我埋單」嘅做法引起社會各界非議。國際間於是制定咗處置機制，避免再用公帑幫呢啲金融機構填氹。
- 阿四：
- 唔用公帑嘅錢，咁用邊個嘅錢？
- 小森：
- 處置機制其中一樣措施，就係要銀行做定準備，將來一旦出事時要自己填氹，由銀行股東同埋債權人承擔返倒閉嘅虧損。
- 阿四：
- 聽落係公平過用公帑，但似乎唔關我呢啲小市民事！
- 小森：
- 好有切身關係就真。你有銀行戶口㗎？
- 阿四：
- 梗係有。
- 小森：
- 未有處置機制前，銀行倒閉就要清盤。一清盤嘅話，銀行客戶提款、轉帳呢啲基本銀行服務就統統無得用。不過有咗處置機制後，畀咗金管局權力幫銀行善後，一發現銀行要倒閉，金管局可以火速介入，確保銀行服務唔會中斷。想深入啲知道處置機制係乜，可以睇下陳總噚日發表嘅《匯思》文章。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
