回歸廿年看港銀發展

小森阿四專欄

2017年06月30日

回歸廿年看港銀發展

小森:
上星期我哋講開回歸之後,港紙發行有增無減,其實呢廿年嚟,香港銀行嘅發展同樣穩中向好。

阿四:
我知!去年銀行資產總值接近廿一萬億元,差唔多係九七年嘅二點五倍。

小森:
如果你將銀行總資產值同香港GDP比較,仲可以睇到更多。你睇下幅圖:九七年時銀行資產值大約相等於GDP六倍,去年已經升到超過八倍。香港作為亞洲區嘅銀行中心,有唔少跨國銀行以香港作為亞太區總部,銀行業唔單止服務本地經濟活動,更為區內客戶做資金融通,去年大約有三成港銀貸款喺香港以外使用。

阿四:
呢個資產對GDP比例係咪愈大愈好呢?

小森:
當然唔可以只係睇數字。冰島同愛爾蘭嘅銀行總資產亦曾經增長到GDP嘅九倍,但因為無做好風險管理,喺○八年遇上環球金融危機,○九年出現銀行危機,銀行體系資產狂跌!香港經歷過九七亞洲金融危機,汲取教訓同經驗,着力進行多項鞏固貨幣同金融體系嘅改革,所以港銀喺○八年能夠抵擋全球金融危機帶嚟嘅巨大衝擊。特區政府亦果斷、適時推出一千億嘅中小企融資擔保計劃,及時保住一大批中小企同幾十萬打工仔飯碗。港銀多年得以穩定發展唔係因為好彩,只係平日做足準備功夫。

阿四:
唔怪得陳總不時提金管局同事:「金融穩定」係「重中之重」。

 銀行資產總值與GDP比例


想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2017年06月30日