- 小森：
- 回歸廿周年你有乜嘢節目？
- 阿四：
- 似乎有好多慶祝活動，有啲選擇困難症。話時話，呢排興回顧同前瞻，最近有人問我：港紙會唔會被邊緣化？你醒啲點答？
- 小森：
- 好易啫，貨幣邊緣化泛指香港人自己都不願用港紙做日常支付同交易如購物和出糧等，你話有冇？況且《基本法》第111條寫得好清楚：港元係香港特別行政區嘅法定貨幣，會繼續流通。
- 阿四：
- 但啲人周圍見到舖頭收人民幣，難怪會咁諗。
- 小森：
- 內地遊客多咗，商舖為方便遊客收人民幣好正常喎，其實有啲遊客區舖頭一直都有收美金、歐元、日元㗎。你有冇試過出街畀錢唔收港紙先？數字無得呃，自回歸以嚟，港紙發行愈黎愈多，去年港紙流通量近4,100億元，佔GDP比例由97年6.3%上升到16.4%。
- 阿四：
- 但似乎大家多咗揸外幣喎。
- 小森：
- 畀幅圖你睇下啦。97年至今，香港銀行嘅總存款港紙一直穩佔半壁江山。你都知香港人鍾意買外幣，所以餘下一半由唔同外幣組成，近年市民係揸多咗人民幣，而揸少咗嘅並非港幣，而係美元以外嘅其他貨幣！
- 阿四：
- 聽完你講，我識答啦！
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
