《公平待客約章》

小森：

你聽過《公平待客約章》（《約章》）未？

阿四：

係乜嚟？

小森：

金管局喺2013年推動制定約章，希望銀行重視「以客為本」嘅精神，當時全港22間零售銀行都簽咗約章。而噚日就公布全港47間私人財富管理機構已經承諾履行約章，落實「以客為本」嘅精神。

阿四：

私人銀行客戶唔係全部都係有錢人？佢哋應該可以照顧到自己權益，點解仲要私人銀行落實《約章》？

小森：

雖然私人銀行客戶嘅財富多過一般零售客戶，但佢哋同樣需要合適嘅保障。《約章》有五大原則，包括（一）服務同產品應該係根據客戶需要而設計，而唔係單睇利潤；（二）列明同清楚解釋產品條款；（三）推廣資料要準確易明；（四）向客戶提供合理嘅投訴同申索渠道；（五）銀行應該同政府合作推廣金融教育。簡單嚟講就係無論做零售或私人銀行生意，都要顧及客戶權益。

阿四：

呢啲原則睇落都好虛！前線職員為咗跑數同花紅就要sell客，邊顧到咁多！

小森：

呢啲高層次嘅原則用字比較虛，係要留返啲空間畀銀行管理層由虛入實，根據自己嘅企業文化同價值觀制定具體指引畀員工去執行。

阿四：

金管局呢幾年為推動香港私人財富管理行業嘅可持續發展做咗好多嘢，例如近期嘅「先導人才培訓計劃」吸引好多同學報名申請，本來20個實習名額，最終超額請咗29位同學。

小森：

客戶將畢生積蓄交託銀行係基於一份信任，所以銀行要行「穩善之道」，除咗要有嚴謹嘅監管制度、良好嘅企業文化，仲要有合適嘅獎勵制度去配合嘛！

阿四：

呢番話咁熟嘅？

小森：

陳總早排喺《匯思》寫文講嘅，有興趣可以按以下連結睇返原文！
http://www.hkma.gov.hk/chi/key-information/insight/20170316.shtml

想問多啲有關金管局工作，歡迎電郵到小森、阿四專用郵箱：
88hkma@hkma.gov.hk