- 小森：
- 聽講第二批銀色債券就快有公布，我八卦到銀債嘅宣傳單張已經有定稿。
- 阿四：
- 一張宣傳單張啫，求其搵兩位「老友記」影張相咪得囉。
- 小森：
- 金管局做事點會求求其其！一張簡單嘅宣傳單張都好多學問。講個秘密你知，舊年推第一批銀債嘅宣傳單張，其中一個構思係嫲嫲踩單車載住爺爺嘅…
- 阿四：
- 好甜蜜蜜！點解無見過？
- 小森：
- 因為香港法例唔准單車載人，所以海報都唔可以出現呢個情景。
- 阿四：
- 銀色債券賣點係保證最少兩厘回報，第一批銀債派咗幾多息？
- 小森：
- 銀債係一年派息兩次，今年2月已經派咗第一次利息，年息有2.15厘，以每人平均有四手計，即係半年收咗大約400幾蚊，都夠飲餐茶㗎。
- 阿四：
- 我記得上次銀債發行30億元，有超過7萬位「老友記」認購，最年長個位認購人有102歲！90歲以上認購人超過400個。
- 小森：
- 銀債另一個好處就係「老友記」需要套現應急嘅話，隨時可以原價賣返畀政府。不過咁，第一批銀債提前贖回金額佔總發行額都唔夠1%，證明買得銀債嘅「老友記」都係長線持有。
- 阿四：
- 等我都幫爸爸媽媽研究下。
- 小森：
- 香港人愈來愈長壽，當然關心退休後點樣理財。其實除咗銀債，金管局嘅按揭證券公司都有安老按揭，遲啲仲會推出終身年金計劃，等「老友記」可以有多啲選擇。
圖片說明：去年銀債宣傳單張用咗「老友記」淋盆栽做主題。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
