- 小森：
- 听讲第二批银色债券就快有公布，我八卦到银债嘅宣传单张已经有定稿。
- 阿四：
- 一张宣传单张啫，求其搵两位「老友记」影张相咪得罗。
- 小森：
- 金管局做事点会求求其其！一张简单嘅宣传单张都好多学问。讲个秘密你知，旧年推第一批银债嘅宣传单张，其中一个构思系嫲嫲踩单车载住爷爷嘅…
- 阿四：
- 好甜蜜蜜！点解无见过？
- 小森：
- 因为香港法例唔准单车载人，所以海报都唔可以出现呢个情景。
- 阿四：
- 银色债券卖点系保证最少两厘回报，第一批银债派咗几多息？
- 小森：
- 银债系一年派息两次，今年2月已经派咗第一次利息，年息有2.15厘，以每人平均有四手计，即系半年收咗大约400几蚊，都够饮餐茶㗎。
- 阿四：
- 我记得上次银债发行30亿元，有超过7万位「老友记」认购，最年长个位认购人有102岁！90岁以上认购人超过400个。
- 小森：
- 银债另一个好处就系「老友记」需要套现应急嘅话，随时可以原价卖返畀政府。不过咁，第一批银债提前赎回金额占总发行额都唔够1%，证明买得银债嘅「老友记」都系长线持有。
- 阿四：
- 等我都帮爸爸妈妈研究下。
- 小森：
- 香港人愈来愈长寿，当然关心退休后点样理财。其实除咗银债，金管局嘅按揭证券公司都有安老按揭，迟啲仲会推出终身年金计划，等「老友记」可以有多啲选择。
图片说明：去年银债宣传单张用咗「老友记」淋盆栽做主题。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
