年金問與答

小森阿四專欄

2017年05月12日

年金問與答

阿四:
我爸爸問我買年金好唔好。佢最想知道第日走咗後,後人係咪可以攞返筆本金,同做定期存款一樣?

小森:
年金同定期存款嘅概念唔同。年金係一種保險產品,世伯要先放一筆保費,然後每月定額發放一筆錢畀佢,直至百年歸老。按揭證券公司計劃推出嘅終身年金計劃,保證投保人每月收取嘅年金,加加埋埋起碼會有最初一筆保費嘅105%。假設六十五歲男性投保一百萬元,即是保證金額有一百零五萬元,按初步估算會分一百八十二個月發放,每月大約收取五千八百元。大吉利是咁講,如果佢未攞足期數就同大家講拜拜,後人會繼續分期攞埋剩餘期數,直至收足一百零五萬元為止。

阿四:
佢買咗年金後,可唔可以中途退保?

小森:
可以,但因為要提早一筆過退回保費,頭先講嘅一百零五萬要打個折扣先畀返佢。世伯要有心理準備,如果投保頭幾年就退出,會扣咗一舊錢,攞唔足一百零五萬元。

阿四:
即係一係唔買,一買就最好放埋唔好理。如果佢走咗,後人想一筆過攞返年金剩餘期數又點計?

小森:
計法同中途退保一樣。

阿四:
有投資專家話買股票收息回報好過年金。

小森:
兩樣產品嘅回報同風險都唔同,最重要係清楚知道邊種產品啱自己。不如等終身年金計劃正式推出時,你陪世伯一齊睇清楚細節,佢先再決定係咪投保啦。


想問多啲有關金管局工作,歡迎電郵到小森、阿四專用郵箱:
88hkma@hkma.gov.hk



最新小森阿四專欄
修訂日期 : 2017年05月12日