- 阿四：
- 我爸爸问我买年金好唔好。佢最想知道第日走咗后，后人系咪可以攞返笔本金，同做定期存款一样？
- 小森：
- 年金同定期存款嘅概念唔同。年金系一种保险产品，世伯要先放一笔保费，然后每月定额发放一笔钱畀佢，直至百年归老。按揭证券公司计划推出嘅终身年金计划，保证投保人每月收取嘅年金，加加埋埋起码会有最初一笔保费嘅105%。假设六十五岁男性投保一百万元，即是保证金额有一百零五万元，按初步估算会分一百八十二个月发放，每月大约收取五千八百元。大吉利是咁讲，如果佢未攞足期数就同大家讲拜拜，后人会继续分期攞埋剩余期数，直至收足一百零五万元为止。
- 阿四：
- 佢买咗年金后，可唔可以中途退保？
- 小森：
- 可以，但因为要提早一笔过退回保费，头先讲嘅一百零五万要打个折扣先畀返佢。世伯要有心理准备，如果投保头几年就退出，会扣咗一旧钱，攞唔足一百零五万元。
- 阿四：
- 即系一系唔买，一买就最好放埋唔好理。如果佢走咗，后人想一笔过攞返年金剩余期数又点计？
- 小森：
- 计法同中途退保一样。
- 阿四：
- 有投资专家话买股票收息回报好过年金。
- 小森：
- 两样产品嘅回报同风险都唔同，最重要系清楚知道边种产品啱自己。不如等终身年金计划正式推出时，你陪世伯一齐睇清楚细节，佢先再决定系咪投保啦。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
