- 阿四：
- 小森，頭先食飯每人夾88蚊，你仲未畀返我！
- 小森：
- 你睇下啦，我銀包得返一張「紅衫魚」，上面仲崩咗一個角，唔畀得你。
- 阿四：
- 銀紙爛咗都係錢，點解唔畀得我？
- 小森：
- 你有所不知，損壞咗嘅紙幣係有可能唔被接受做法定貨幣㗎。
- 阿四：
- 如果唔覺意收到張霉霉爛爛嘅銀紙，咁點算好？
- 小森：
- 崩咗角、污漕咗嘅銀紙仍然用得㗎，但如果你覺得唔順眼，最好都係拎返發鈔銀行回收。一般嚟講，銀行會驗證張銀紙係咪真鈔、損毀面積有冇超過1/4、防偽特徵係咪完整，無以上問題就可以兌返錢。
- 阿四：
- 我咁啱有兩張爛咗一半嘅銀紙，與其兩張都唔用得，不如黐埋做一張，咁咪可以減少損失！
- 小森：
- 你咁樣合成銀紙可能會被控告製造偽幣，差人拉你㗎。銀行職員驗鈔時，會檢查埋左右兩邊係咪有完整嘅相同鈔票號碼。
- 阿四：
- 講開銀紙，其實香港有幾多張銀紙？
- 小森：
- 總發行量大約有20幾億張。你知唔知以邊種面值嘅銀紙佔最多張？
- 阿四：
- 睇下我銀包就知，應該係廿蚊紙最多。
- 小森：
- 幾醒喎。香港流通嘅紙幣之中，廿蚊紙佔最多張，每100張銀紙就有36張係廿蚊。如果計發行金額嘅話，你又估下邊種佔最多？
- 阿四：
- 唔使問，一定係金牛啦！
- 小森：
- 又估啱喎。金牛發行量唔係最多，但以金額計就佔總發行金額嘅47%。咁你又知唔知除咗3間發鈔銀行外，仲有邊個可以發行紙幣？
- 阿四：
- 嗄？仲有邊個呢？
- 小森：
- 你攞張10蚊紙睇睇就有答案。上面印住「香港特別行政區政府」。由2002年開始，香港政府開始發行紫色設計嘅10蚊紙，而政府只係發行10蚊紙同所有面值嘅硬幣，而其他面額嘅紙幣由3間發鈔銀行發行。
- 阿四：
- 香港嘅10蚊最多版本，除咗早年由兩間發鈔行發行嘅「青蟹」，紫色版本都分紙鈔同膠鈔，仲有硬幣㖭！講咗咁耐，你仲未畀飯錢喎。
- 小森：
- 儲值工具咁方便，我而家就用手機過數畀你。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
