- 阿四：
- 小森，头先食饭每人夹88蚊，你仲未畀返我！
- 小森：
- 你睇下啦，我银包得返一张「红衫鱼」，上面仲崩咗一个角，唔畀得你。
- 阿四：
- 银纸烂咗都系钱，点解唔畀得我？
- 小森：
- 你有所不知，损坏咗嘅纸币系有可能唔被接受做法定货币㗎。
- 阿四：
- 如果唔觉意收到张霉霉烂烂嘅银纸，咁点算好？
- 小森：
- 崩咗角、污漕咗嘅银纸仍然用得㗎，但如果你觉得唔顺眼，最好都系拎返发钞银行回收。一般嚟讲，银行会验证张银纸系咪真钞、损毁面积有冇超过1/4、防伪特征系咪完整，无以上问题就可以兑返钱。
- 阿四：
- 我咁啱有两张烂咗一半嘅银纸，与其两张都唔用得，不如黐埋做一张，咁咪可以减少损失！
- 小森：
- 你咁样合成银纸可能会被控告制造伪币，差人拉你㗎。银行职员验钞时，会检查埋左右两边系咪有完整嘅相同钞票号码。
- 阿四：
- 讲开银纸，其实香港有几多张银纸？
- 小森：
- 总发行量大约有20几亿张。你知唔知以边种面值嘅银纸占最多张？
- 阿四：
- 睇下我银包就知，应该系廿蚊纸最多。
- 小森：
- 几醒喎。香港流通嘅纸币之中，廿蚊纸占最多张，每100张银纸就有36张系廿蚊。如果计发行金额嘅话，你又估下边种占最多？
- 阿四：
- 唔使问，一定系金牛啦！
- 小森：
- 又估啱喎。金牛发行量唔系最多，但以金额计就占总发行金额嘅47%。咁你又知唔知除咗3间发钞银行外，仲有边个可以发行纸币？
- 阿四：
- 嗄？仲有边个呢？
- 小森：
- 你攞张10蚊纸睇睇就有答案。上面印住「香港特别行政区政府」。由2002年开始，香港政府开始发行紫色设计嘅10蚊纸，而政府只系发行10蚊纸同所有面值嘅硬币，而其他面额嘅纸币由3间发钞银行发行。
- 阿四：
- 香港嘅10蚊最多版本，除咗早年由两间发钞行发行嘅「青蟹」，紫色版本都分纸钞同胶钞，仲有硬币㖭！讲咗咁耐，你仲未畀饭钱喎。
- 小森：
- 储值工具咁方便，我而家就用手机过数畀你。
想问多啲有关金管局工作，欢迎电邮到小森、阿四专用邮箱：
88hkma@hkma.gov.hk
