- 阿四：
- 小森，我表弟搵緊暑期工，有冇好介紹呢？
- 小森：
- 金管局同私人財富管理公會合辦的先導人才培訓計劃，喺聽日（四月八日）舉行招聘日，可以叫佢過來睇下。
- 阿四：
- 去私人銀行實習咁好！講多啲嚟聽下。
- 小森：
- 呢個計劃旨在培訓有志投身私人財富管理行業嘅大學生，為香港金融服務業專才注入新血。獲聘嘅同學將會連續兩年暑假接受在職訓練，喺私人銀行唔同部門工作，學習不同產品嘅知識、客戶服務、風險管理、合規，同埋內部監控。
- 阿四：
- 由前線點樣面對客戶，以至內部管控都要學，真係非常全面喎！呢個計劃會請幾多人？
- 小森：
- 今次推出嘅係先導計劃，參加嘅私人銀行有十間，大約提供二十個實習職位。首屆實習期會短啲，第一個暑假實習六星期，下年八星期。下屆開始嘅實習期都係每個暑假八星期。
- 阿四：
- 實習有冇人工㗎？
- 小森：
- 每月會有不少於一萬元嘅培訓津貼，唔錯㗎。
- 阿四：
- 聽日招聘日會有啲乜？
- 小森：
- 除咗會詳細介紹返呢個計劃外，仲會由一班做緊私人財富管理嘅師兄師姐以小組討論形式，分享返佢哋對行業前景嘅睇法。同學亦可以把握今次機會，同參與計劃嘅私人銀行高層代表交流。
- 阿四：
- 可惜我表弟唔係讀經濟、金融科，這些機會不是屬於他。
- 小森：
- 又未必，私人財富管理需要唔同範疇嘅人才，呢個計劃歡迎八間資助大學就讀任何科目嘅學生申請。
- 阿四：
- 計劃幾時截止報名？
- 小森：
- 四月十五日就截止，有興趣就快手啦。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
圖片說明：私人財富管理先導人才培訓計劃申請表格QR Code
