紙幣爛咗點算好?

小森阿四專欄

2018年11月16日

紙幣爛咗點算好?

阿四:
有讀者寫信嚟,話屋企小朋友唔小心將十蚊紙幣對半撕爛咗,問可以點做?

 

小森:
佢可以拎返去發鈔銀行換。銀行會按既定嘅準則嚟驗證真偽同損毀程度,例如會驗下張銀紙係咪真鈔、睇下防偽特徵仲係咪完整、損毀面積有幾嚴重等。一般嚟講,如果無以上呢啲問題,銀行都會換返錢畀市民嘅。

 

阿四:
但係十蚊紙幣由香港特區政府發行喎,市民可以去邊度兌換呢?

 

小森:
匯豐銀行係政府十元紙幣嘅代理銀行,所以市民可以去佢哋分行兌換已損毀嘅十元紙幣。

 

阿四:
其實既然銀紙只不過對半撕爛咗,黐返埋用又得唔得?

 

小森:
最好都係交返畀發鈔銀行啦。提醒你,千祈唔好將兩張不同號碼嘅鈔票黐埋一齊,咁做係合成銀紙,唔係法定貨幣嚟喎。

 

阿四:
而家電子支付咁發達,我估銀紙、散銀都少咗人用啩?

 

小森:
咁你又估錯喎。睇下個圖就知,過去五年(2013-2017年)香港紙幣嘅總流通金額年年有增長,五年內增長近四成㗎!仲有大家都唔多鍾意袋住嘅「神沙」,連同政府發行嘅十元紙幣,過去五年流通量都有增加。增長嘅原因係經濟活動多咗、來港遊客增多等。

 

銀行紙幣流通金額
銀行紙幣流通金額

 

政府發行十元紙幣及硬幣流通金額
政府發行十元紙幣及硬幣流通金額

 

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年11月16日