- 阿四：
- 人體血管將養份輸送到身體各部位，咁你知唔知銀行體系點樣輸送資金？
- 小森：
- 我估你講緊啱啱開會提到嗰個RTGS系統，全名係Real Time Gross Settlement系統(即時支付結算系統)，係香港金融基建最重要骨幹。金管局喺1996年推出港元RTGS系統，畀銀行業一個高效、安全、簡便嘅平台進行同業之間嘅支付結算。除咗銀行之間嘅大額支付項目外，RTGS系統仲會處理同我哋日常生活相關嘅支付，例如支票、股票買賣、自動櫃員機轉帳等嘅資金往來。你日日用緊唔多覺，但無咗佢就好大件事！
- 阿四：
- RTGS系統咪好忙？
- 小森：
- 現時RTGS系統平均每日交易金額大約9,200億元，仲多過香港2017年第四季GDP（約7,200億元）。2017年全年港元RTGS系統成交額大約260萬億元，差唔多係全年GDP嘅130倍。
- 阿四：
- 原來RTGS系統幫香港處理咁多錢銀交收！
- 小森：
- 呢個系統等如銀行血脈，如果唔暢順，輕則增加銀行嘅流動資金壓力，造成利率飆升，嚴重嘅話甚至令銀行停止運作。慶幸嘅係，RTGS系統運作廿幾年嚟，由港元開始，之後支持埋美元、歐元同人民幣，都一直「零意外」，為香港嘅金融穩定默默作出貢獻。
- 阿四：
- 哦，我終於明白點解頭先開會講RTGS系統！因為下星期公布推出嘅「快速支付系統」就係RTGS系統嘅加強版，會打通電子錢包、銀行戶口之間嘅阻隔，以後市民只需要一個電話號碼或電郵地址，就可以透過「快速支付系統」即時收到轉帳款項。
- 小森：
- 以你轉數嚟講，都理解得好快，下星期我哋再講多啲呢個系統有幾勁。
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
