金管追「風」

小森阿四專欄

2018年08月31日

金管追「風」

阿四:
話說航海家哥倫布因為遇到「貿易風」先發現到南美洲。佢個陣應該勢估唔到,幾百年後貿易風會變成人類嘅再生能源。

 

小森:
你咁好興致講歷史?

 

阿四:
我最近發現原來外匯基金有投資再生能源,咁咪順便研究各地再生能源嘅歷史囉。

 

小森:
再生能源近年受投資界熱捧,因為既符合ESG(環境、社會、管治)國際原則,又能提供長線穩定嘅回報。外匯基金亦希望為地球可持續發展出一分力,近年都將ESG納入投資嘅考慮,不過前提係,投資項目可以提供長期穩定嘅回報,唔會為投而投。

 

阿四:
聽落再生能源都符合到外匯基金「保本先行、長期增值」理念,但萬一天然資源,例如風力唔夠去發電,投資會唔會蝕本?

 

小森:
外匯基金進行每項投資前,都會進行嚴格嘅盡職審查,除咗睇文件、睇數字,需要嘅話仲會到實地考察,有時仲會搵專業機構畀意見。不過始終天有不測風雲,風力強弱唔係人為可控制,所以一個項目可能會包括不同地方嘅風力發電場,透過互補長短,穩定總體發電水平。另外,外匯基金又會投資唔同類型嘅再生能源項目,例如水力或者太陽能發電嘅項目,嚟進一步分散天然資源風險。

 

 

想問多啲有關金管局工作,歡迎電郵到小森、阿四專用郵箱:
88hkma@hkma.gov.hk

最新小森阿四專欄
修訂日期 : 2018年08月31日