- 小森：
- 食晏個陣見到你一個人喺IFC商場頭耷耷、篤住手機四圍騰，搞乜？
- 阿四：
- 我玩緊金管局新鮮出爐嘅手機遊戲「2018尋鈔記」！只要喺「五個look．逐個捉」入面搵齊新鈔五個主題嘅代表圖像，填寫埋所需嘅個人資料，手機程式就會彈一個二維碼出嚟，玩家要去金管局舉辦嘅新鈔展覽掃瞄二維碼，就可以參加大抽獎。去開展覽當然要順便睇睇新鈔主題同防偽特徵。
- 小森：
- 大抽獎獎品包括三間發鈔銀行各自兩套嘅「特別解構版」新鈔，仲有造型趣緻嘅收銀車限量版模型㖭。不過提提你，金管局員工唔可以參加抽獎㗎喎！
- 阿四：
- 我知！我只係想透過呢個遊戲認識多啲2018新鈔系列。今次係香港三間發鈔銀行首次統一鈔票嘅設計主題，分別係國際金融中心（一千元）、地質公園（五百元）、粵劇（一百元）、蝴蝶（五十元）同埋飲茶（二十元），可以凸顯香港嘅獨特面貌。另外，金管局亦為視障人士推出手機程式「讀鈔易」，方便佢哋識別鈔票銀碼，新舊系列鈔票都用到。
- 小森：
- 你都知幾多嘢喎。
- 阿四：
- 梗係！除咗展覽外，大家仲可以透過手機程式「2018尋鈔記」同金管局新推出嘅Facebook專頁了解新鈔唔同嘅防偽特徵。
- 小森：
- 小森阿四嘅忠實讀者，如果你哋仲未關注金管局Facebook專頁，記得快啲按以下網址或掃瞄二維碼畀個like我哋，歡迎留言同我哋打氣。
圖片說明：集齊新鈔五個主題圖像就可以參加大抽獎！
金管局Facebook專頁網址：
http://www.facebook.com/hkmagovhk
金管局Facebook專頁二維碼：
想問多啲有關金管局工作，歡迎電郵到小森、阿四專用郵箱：
88hkma@hkma.gov.hk
